புதுச்சேரி, ஜூலை. 9–

பி.பி.எல். 20 ஓவர் கிரிக்கெட் போட்டிகள் நேற்று முன்தினம் துத்திப்பட்டு சீக்கேம் மைதானத்தில் தொடங்கி, நடைபெற்று வருகிறது.

நேற்று மதியம் 2 மணிக்கு நடந்த 2-வது லீக் போட்டியில் ஜெனித்ஏனாம் ராயல்ஸ்–ரூபி ஒயிட் டவுன் லெஜண்ட்ஸ் அணிகள் மோதின. டாஸ் வென்ற ஏனாம் அணி முதலில் பந்து வீச முடிவு செய்தது. அதன்படி முதலில் களமிறங்கிய ஒயிட் டவுன் அணி 20 ஓவர்கள் முடிவில் 7 விக்கெட்டுக்கு 156 ரன்கள் எடுத்தது. ஒயிட் டவுன் அணி தொடக்கத்திலேயே விக்கெட்டுகளை இழந்ததால் ரன்வேகம் தடைபட்டது. நெயன் காங்கேயன் (11), ஆயுத் சர்மா (9), பரத் ராவத் (1) அடுத்தடுத்து வெளியேறி 32 ரன்களுக்கு 3 விக்கெட்டுகளை இழந்து தவித்தது.

கடைசி கட்டத்தில் அதிரடியாக ஆடிய சிவ சுபாஷ் 12 பந்துகளில் (5 சிக்சர், 1 பவுண்டரி) 38 ரன்கள் எடுத்தார். தர்ஷன் ராஜகோபால் தனது பங்குக்கு 46 ரன்கள் எடுத்து கடைசி வரை களத்தில் இருந்தார். ஏனாம் அணியில் பிரனாய்சிங் 3 விக்கெட்டுகளை வீழ்த்தினார்.

பின்னர் 157 ரன்கள் எடுத்தால் வெற்றி என்ற இலக்குடன் களமிறங்கிய ஏனாம் ராயல்ஸ் அணி 15.1 ஓவர்களில் 4 விக்கெட்டுகளை மட்டுமே இழந்து 157 ரன்கள் எடுத்து 6 விக்கெட்டுகள் வித்தியாசத்தில் வெற்றி பெற்றது. அதிரடியாக மட்டையை சுழற்றிய எஸ். பரமேஸ்வரன் 25 பந்துகளில் (6 பவுண்டரி, 5 சிக்சர்) 66 ரன்கள் எடுத்து வெற்றிக்கு வழிவகுத்தார். அவருக்கு ஆட்டநாயகன் விருது வழங்கப்பட்டது.

மாலை 6 மணிக்கு நடந்த 3-வது லீக் போட்டியில் ஊசுடு அணியும், காரைக்கால் நைட்ஸ் அணியும் மோதின. முதலில் பேட்டிங் செய்த காரைக்கால் அணி 20 ஓவர்கள் முடிவில் 6 விக்கெட் இழப்புக்கு 155 ரன்கள் எடுத்தது. அதனைத் தொடர்ந்து விளையாடிய ஊசுடு அணி 17.1 ஓவரில் 5 விக்கெட் இழந்து 158 ரன்கள் எடுத்து வெற்றி பெற்றது. 31 பந்துகளில் 68 ரன்கள் (3 பவுண்டரி, 7 சிக்சர்) விளாசி வெற்றிக்கு வித்திட்ட ஊசுடு அணியின் கேப்டன் சாகர் திருவேதிக்கு ஆட்டநாயகன் விருது வழங்கப்பட்டது.