கிருஷ்ணகிரி மாவட்டம் போச்சம்பள்ளி அடுத்த மத்தூரில் பெருந்தலைவர் கர்மவீரர் காமராஜரின் 124-வது பிறந்தநாள் விழா பொதுமக்களாலும், இளைஞர்களாலும் மிகுந்த உற்சாகத்துடன் கோலாகலமாக கொண்டாடப்பட்டது.
மத்தூர் ஒன்றியத்தை சேர்ந்த நாடார் சமுதாயத்தினர் மற்றும் காமராஜர் இளைஞர் நற்பணி மன்றத்தினர் இணைந்து இந்த விழாவினை சிறப்பான முறையில் ஏற்பாடு செய்திருந்தனர். விழாவின் சிறப்பம்சமாக, காமராஜரின் திருவுருவச் சிலைக்கு 124 கிலோ எடையிலான பிரம்மாண்டமான மலர் மாலை தயார் செய்யப்பட்டது. இந்த மாலையை கிரேன் உதவியுடன் சிலைக்கு அணிவித்து இளைஞர்கள் தங்களது வீர வணக்கத்தையும் மரியாதையையும் செலுத்தினர்.
இதனை தொடர்ந்து விழாவில் கலந்துகொண்ட பொதுமக்களுக்கு இனிப்புகள் வழங்கப்பட்டன. மேலும் கல்விக்கண்திறந்த கர்மவீரரின் நினைவை போற்றும் வகையில் அப்பகுதியில் திரண்டிருந்த ஆயிரத்திற்கும் மேற்பட்டோருக்கு அறுசுவை அன்னதானம் வழங்கப்பட்டது.
இந்தக் கொண்டாட்டத்தில் மத்தூர் மற்றும் அதனைச் சுற்றியுள்ள கிராமங்களைச்சேர்ந்த 500-க்கும் மேற்பட்ட பொதுமக்கள் திரளாகக் கலந்துகொண்டு, காமராஜரின் திருவுருவச்சிலைக்கு மாலை அணிவித்து மரியாதை செலுத்தினர். சமூக ஒற்றுமையை வெளிப்படுத்தும் வகையில் மக்கள் அனைவரும் ஒன்றிணைந்து காமராஜரின் பிறந்தநாளை வெகு விமரிசையாக கொண்டாடியது அந்த பகுதியில் பெரும் வரவேற்பை பெற்றது.