சேலம் இனி தளபதியின் கோட்டை- எதிர்க்கட்சிகளுக்கு தவெக அமைச்சர்கள் சவால்.

இடைத்தேர்தலுக்கு குறி.

சேலத்தில் நடைபெற்ற தமிழக வெற்றி கழக (தவெக) நிர்வாகிகள் ஆலோசனைக் கூட்டத்தில் அமைச்சர்கள் விஜய் தமிழன் பார்த்திபன் மற்றும் அருண்ராஜ் பங்கேற்று, கட்சியின் எதிர்கால தேர்தல் வியூகம், அமைப்பு வளர்ச்சி மற்றும் அரசியல் நிலைப்பாடு குறித்து பேசினர்.

வரவிருக்கும் உள்ளாட்சி மற்றும் நாடாளுமன்றத் தேர்தல்களை இலக்காகக் கொண்டு கட்சியினருக்கு உற்சாகமூட்டும் வகையில் அவர்கள் உரையாற்றினர்.

“பல தடைகளைத் தாண்டி வளர்ந்த இயக்கம்”

அமைச்சர் விஜய் தமிழன் பார்த்திபன் பேசுகையில், சேலத்தில் மக்கள் சந்திப்பு விழாவை நடத்துவதற்கே ஏராளமான தடைகள் உருவாக்கப்பட்டதாகக் குறிப்பிட்டார். எந்த வகையிலாவது நிகழ்ச்சியை தடுக்க முயற்சிகள் நடந்தாலும், அனைத்தையும் கடந்து விழா வெற்றிகரமாக நடைபெற்றதாக தெரிவித்தார். இன்று அதே சேலம் மாவட்டத்தில் அரசியல் சூழல் முற்றிலும் மாறியிருப்பதாகவும் அவர் கூறினார்.

“உழைப்புக்கு உரிய அங்கீகாரம் கிடைக்கும்”

கட்சியில் இணையும் ஒவ்வொரு நிர்வாகிக்கும், தொண்டருக்கும் அவர்கள் உழைப்புக்கேற்ற அங்கீகாரம் சரியான நேரத்தில் வழங்கப்படும் என்று உறுதியளித்த அவர், பதவிக்காக அல்ல, மக்களுக்காகவே பணியாற்ற வேண்டும் என்றார். பதவிகள் நிரந்தரமல்ல; ஆனால் தலைவருக்கான தொண்டனாக இருப்பதே பெருமை என்றும், மக்களின் நம்பிக்கையைப் பெறுவதே கட்சியின் உண்மையான பலம் என்றும் வலியுறுத்தினார்.

உள்ளாட்சி, நாடாளுமன்ற தேர்தலில் அங்கீகாரம் பெற வேண்டும்

எதிர்வரும் உள்ளாட்சி மற்றும் நாடாளுமன்றத் தேர்தல்களில் மக்கள் அளிக்கும் வெற்றியே கட்சிக்கு கிடைக்கும் உண்மையான அங்கீகாரம் என தெரிவித்த அவர், தமிழ்நாட்டில் உருவான மக்கள் ஆட்சியைப் போலவே மத்தியிலும் கட்சித் தலைவர் நிர்ணயிக்கும் ஆட்சி அமைய அனைவரும் உழைக்க வேண்டும் என்றார். இனி எந்த தேர்தல் வந்தாலும் “விசில் சத்தம்” மட்டுமே கேட்க வேண்டும் என்றும், தவெக போன்ற இயக்கம் வேறு எங்கும் இல்லை என்றும் அவர் குறிப்பிட்டார்.

“சேலம் இனி தளபதியின் கோட்டை”

சேலம் மாவட்டம் சிலரின் அரசியல் கோட்டை என கூறப்பட்டாலும், கடந்த சட்டமன்றத் தேர்தலிலேயே அந்த கோட்டையில் ஓட்டை விழுந்துவிட்டதாக தெரிவித்த அவர், இனி சேலம் முழுமையாக தளபதியின் கோட்டையாக மாறிவிட்டது என்றார். மேலும், சில முக்கிய அரசியல் கட்சிகள் அடுத்த உள்ளாட்சி மற்றும் நாடாளுமன்றத் தேர்தல்களில் போட்டியிட வேட்பாளர்களையே தேடி அலைவார்கள் என்றும் விமர்சித்தார்.

“மக்களின் வலியை உணர்பவரே உண்மையான தலைவர்”

அமைச்சர் அருண்ராஜ் தனது உரையில், அதிகார நாற்காலியில் இருந்து உத்தரவிடுபவர் தலைவரல்ல; மக்களின் வலியையும் உணர்வுகளையும் புரிந்து அன்போடு ஆட்சி நடத்துபவரே உண்மையான தலைவர் என்றும், அதற்கு தற்போதைய முதலமைச்சரே எடுத்துக்காட்டு என்றும் கூறினார். தற்போதுதான் நல்லாட்சி நடைபெறுவதாக மக்கள் நிம்மதி பெருமூச்சு விடுவதாகவும் அவர் தெரிவித்தார்.

திராவிடக் கட்சிகள் மற்றும் எடப்பாடி பழனிசாமி மீது விமர்சனம்

தமிழகத்தில் கடந்த 60 ஆண்டுகளாக ஆட்சி செய்த திராவிடக் கட்சிகள் மக்கள் நலனை விட ஊழலுக்கே முன்னுரிமை கொடுத்ததாக அருண்ராஜ் குற்றம்சாட்டினார். தேர்தலின் போது பணம் கொடுத்து வாக்குகளைப் பெறலாம் என்ற பழைய அரசியல் கணக்கை மக்கள் இந்த தேர்தலில் நிராகரித்துவிட்டதாகவும் கூறினார்.

எடப்பாடி தொகுதியில் சூழ்ச்சியின் மூலம் எடப்பாடி பழனிசாமி வெற்றி பெற்றதாக குற்றம்சாட்டிய அவர், அதிக வாக்கு வித்தியாசத்தில் வென்றதாக பெருமை பேசுவது அவரது பதவிக்கு அழகல்ல என்றும் விமர்சித்தார்.

“மக்கள் நல நிர்வாகமே எங்கள் இலக்கு”

வரவிருக்கும் உள்ளாட்சி தேர்தலில் அனைத்து இடங்களிலும் தவெக வெற்றி பெறும் என்ற நம்பிக்கையை வெளிப்படுத்திய அருண்ராஜ், திமுக தோல்விக்கு அதன் கவுன்சிலர்களின் செயல்பாடுகளே முக்கிய காரணம் என்றும் கூறினார். மக்கள் நலனை மையமாகக் கொண்ட நிர்வாகத்தை வழங்குவதே கட்சியின் நோக்கம் என்றும், அதிகாரிகள் லஞ்சம் கேட்டால் கொடுக்க வேண்டாம் என்று மக்களிடம் கூறும் தைரியம் ஒரு முதலமைச்சருக்கு இருக்க வேண்டும் என்றும் அவர் தெரிவித்தார்.