கல்விக்கு உதவுவது மிகுந்த மகிழ்ச்சி தருகிறது

​லட்சிய ஜனநாயக கட்சித் தலைவர் சார்லஸ் மார்ட்டின் பேச்சு

​ புதுச்சேரி, டிச.22–
புதுவை லட்சிய ஜனநாயக கட்சி சார்பில், காமராஜ் நகர் தொகுதியில் 10 மற்றும் 12-ம் வகுப்பு பொதுத் தேர்வுகளில் வெற்றி பெற்ற அனைத்து மாணவ-மாணவிகளுக்கும் பரிசுகள் வழங்கும் விழா, ஜெயராம் திருமண மண்டபத்தில் நடைபெற்றது.
​விழாவில் லட்சிய ஜனநாயக கட்சியின் தலைவர் சார்லஸ் மார்ட்டின் கலந்து கொண்டு, தேர்வில் வெற்றி பெற்ற மாணவ-மாணவிகளுக்குப் பரிசுகள் மற்றும் கல்வி முன்னேற்றத்திற்கான ஊக்கத்தொகை வழங்கினார். அப்போது மாணவர்களிடையே அவர் பேசியதாவது:–
​”கல்வியை ஊக்குவிக்கும் வகையில் அமைச்சர் ஜான்குமார் இந்த நிகழ்வைச் செய்து வருகிறார். உலகில் நீங்கள் எங்கு சென்றாலும், எந்த உயரத்திற்குச் சென்றாலும் நாட்டுக்கும் நாட்டு மக்களுக்கும் நல்லது செய்ய வேண்டும். நீங்கள் அனைவரும் வாழ்வில் முன்னேறி நல்ல நிலைக்கு வர வேண்டும்.
​நமது தேசத்தின் முதுகெலும்பு கல்வி தான். அந்தக் கல்விக்கு உதவுவது எனக்கு மிகுந்த மகிழ்ச்சியை அளிக்கிறது. இதை நான் என் முக்கிய கடமையாகக் கருதுகிறேன். இந்தப் பணி ஆண்டுதோறும் தொடரும்.
​மேலும் ஒழுங்கு, சுத்தம், தரமான கல்வி மற்றும் வளர்ச்சியுடன் கூடிய புதுவையை, சிங்கப்பூரைப் போல ஒரு முன்னேறிய நகரமாக மாற்றுவதே எனது லட்சியம்.”
​இவ்வாறு அவர் பேசினார். இதனைத் தொடர்ந்து, அரியாங்குப்பம், நெல்லித்தோப்பு மற்றும் காமராஜ் நகர் தொகுதிகளைச் சேர்ந்த லட்சிய ஜனநாயக கட்சியின் பொறுப்பாளர்களுக்கு நினைவுப் பரிசுகள் வழங்கப்பட்டன.